Ang ZERO VAT CAMPAIGN

Hanggang saan na lang makakarating ang iyong P100 ngayon?

Mahirap na para sa isang estudyante na pagkasyahin ang P100 araw-araw para sa pagkain at pamasahe bukod pa sa kanyang mga requirements sa eskwela. Lalo pang mahirap ang kalagayan ngayon lalo pa’t P8.50 na ang minimum na pamasahe, P30 na ang presyo ng bigas at P60 ang pinakamurang value meal sa kasalukuyan.

Oo, mataas ang bilihin at nasa ilalim nga tayo ng isang krisis. Ngunit hindi lamang ito ang dahilan kung bakit kapos pa rin tayo sa kabila ng ating pagtitipid.

Malaking dahilan nito ang pagpataw ng buwis sa mga pangunahing bilihin. Ipinatupad ito bilang Reformed Value Added Tax (R-VAT), na nagpapataw ng 12 mula sa dating 10 porsyentong buwis sa halos lahat ng produkto sa merkado.

Walang sinisino ang regresibong buwis na ito. Mayaman o mahirap, walang ibang pagpipilian kundi bayaran ito. Isa pa, nagiging regresibo ito dahil sa sistema ng pagpapatupad nito. Halimbawa, sa isang hamburger sa fastfood chain, hindi lamang pinapatawan ng R-VAT ang final product. Hindi rin pinatakas ng R-VAT ang ginagamit na krudong panghatid at kuryenteng panggawa sa mga produktong gaya
nito.

Isang malaking kalokohan kung sasabihin ng gobyernong ibinabalik sa masa ang 12% na VAT. Kung totoo man ito, nabawasan man lang sana ang kahirapan nating mga Pilipino sa buhay natin ngayon kahit katiting.

Subalit ipinagtulakan itong ipatanggap sa atin para lang ipambayad sa mga utang panlabas. Mismong ang Department of Finance ang umamin na sa unang taon ng implementasyon, mapupunta lang sa pagbabayad ng utang ang 70% kita mula sa R-VAT.

Sa madaling sabi, hindi na natin kayang dalhin ang ganitong kabigat na pasanin. Magdudulot ng malaking ginhawa sa atin ang pag-alis ng VAT sa mga pangunahing gastusin ng isang ordinaryong Pilipino, partikular na ang pagkain, kuryente at langis.

Kaya’t sa Oktubre 17, 2008 magsama-sama tayo sa isang libreng concert laban sa krisis at kahirapan sa Liwasang Bonifacio, sa tapat ng Post Office sa Lungsod ng Maynila. Samahan natin ang mga magtatanghal na mga bandang handa tayong suportahan sa ating ipinaglalaban.

Samahang Demokratiko ng Kabataan (SDK)
sdk.info@gmail.com

Piglas Kabataan (PK)

PALAG NA!